يالله ياللي تعلم السر والغيب
ياواحد بأمره تهل السحايب
الواحد اللي يعلم الصوت ويجيب
يافاتح بابه لمن جاه تايب
شي تشوفه في حياتك تعاجيب
في تالي الدنيا تشوف العقايب
بعض السلوم الطيبه قامت تشيب
ومحلها زاد الغثا والنشايب
وقل الحيا وتساهل البعض بالعيب
وقام الفضاء يجلب علينا المصايب
وصارت لنا الدنيا هموم ومطاليب
ومن شانها كثر الحسد والطلايب
والعولمه عصر نعيشه عذاريب
عزالله انا فيه سقنا الضرايب
خذها نصحيه من خذا له تجاريب
ومن شاعر يبني البيوت العجايب
ما اقول كل الناس ما تفعل الطيب
الطيب وهبه من جزيل الوهايب
وفرق الرجال يشاف عند المواجيب
ويبان عند مداحمات الكرايب
احدن على ربعه يسن المشاذيب
واحدن ذرا من دونهم للهبايب
واحدن نظره لعاليات المراقيب
واحدن يرب سقوف بعض الخرايب
ورجل سعى للشر وأشعل مشاهيب
لا بد منها ما تنوشه لهايب
لايخدعك حصني ولا يفرسك ذيب
ولا تأمن الخايب بعيد وقرايب
ولا تستمع من هرجته في العراقيب
اللي يقول فلان وفلان غايب
وصلوا على محمد عدد نبت اداعيب
وإعداد ما خط القلم في الكتايب
(
(
