سلام يا روس الرجال مطوعة راس العنيد
نسل الكرام اللي مجملها جزيل افعالها
يامرحبا و مقدمين العود بالنوع الفريد
والبن في صفر الدلال اللي زهى فنجالها
يا لابة الامجاد والوقفات في يوم الوعيد
اللي تحل الكايده غصبٍ على فعّالها
بني تميم اهل الفخر والعز والراي السديد
وافعالنا من روسنا ماهيب من دلّالها
حنا هل الطالات والمدات والمجد التليد
حنا هل الجزلات حن مدهالها ورجالها
واليا حضرنا ساعة الدجال نثبت مانحيد
وسيوفنا ماتركز الا في نحر دجالها
حنا بني هامة مضر والاسم له برق ورعيد
حنا مفاتيح الديار اللي تصك اقفالها
ربعي هل العليا هل التمكين والباس الشديد
والكايدة لا دندنت واسترسلت حنالها
شف باشة الاتراك جاء للدار معتد وعتيد
عوّد كسيرٍ ذايقٍ خيباتها واذلالها
حتى العجم طاحوا نهار الهوش باليد الحديد
وتقيدت ذرعانهم بقيودها وغلالها
حنا حكمنا نجد والحكام منا تستفيد
وشبه الجزيره بيدنا في دقها وجلالها
للحرب صرنا بأول الهيجا ولازلنا نزيد
وجيوشنا متوحده والخيل من خيّالها
حنا غدينا للعرب مدهال في وقتٍ مديد
تميم لا قل العدد وسيوفنا تزهالها
قريحتي هاظت علي وصادت طيورٍ تصيد
بعقابها وصقورها ونسورها وامثالها
وانا تميمي وافتخر واقدم الشي الجديد
يطرب لها جمهورها لامن بدا موالها
بن دامغ اللي كاتب الابيات واقدى بالقصيد
في مدح ربعن ما تنحى من سماه عقالها
