ألا يا الله يامنجي نبيه من قليب وحبس
طلبتك رحمتك يا الله مامن رحمتك ياسي
إله(ن) رجع اليعقوب شوفه يوم شم أللبس
رجع لعيون يعقوب النظر من عقب الادماسي
ترجع للحبيبه روحها وتحيي لعرقً يبس
ألا يا باعث(ن) بأمرك عظام(ن) قبل دراسي
حبيبة قلبي إللي كان يزهاها جميل أللبس
أنا حنيت لحضانه وجيت أدور أوناسي
كشفت الوجه أبي ضحكة زمان وشفت وجه(ن) عبس
لمحة بوجهها حزنً وأسىء وأثر الزمن قاسي
طلبته تسقي العطشان من نبع الشفايف دبس
ولا مدت لي القطره .. ومعها بيان أفلاسي
وحلفته بربه هي حقيقه او بفهمي لابس
أنا ماني مصدق والحقيقه هزني ياسي
ومشيت أتبع خطاي بحسرتي مابين حبس وحبس
وشفت الساقيه ، والجابيه ، وأردامت الساسي
ولقيت البير جفت والحجر كنه جديد الكبس
ألا كيف النخل عقب الشموخ يوطي الراسي
وبكيت ابيتنا إللي مجلسه زين كمره الجبس
ذكرت أبوي وأمي وأخواتي وهنااك مجلاسي
أنا ماطاح دمعي من مروري في مضارب عبس
ولا هاضتني اشواق الغرام بنشوة أحساسي
أنا إللي جيت لـ الروضه ودمعي فاض رقم الحبس
نثرت الدمع بـ أحياض النخل وأحييت هوجاسي
